बाइबल परमेश्वरको वचन हो। परमेश्वरले करिब ४० मानवीय लेखकहरू प्रयोग गरी आफ्ना सत्यताहरू हामी मानिसलाई प्रकट गर्नुभयो। बाइबल लेखन कार्य लगभग १६०० वर्षको अवधिमा पूरा भयो। आज हामीसँग पूरा लिखित परमेश्वरको वचन उपलब्ध छ। बाइबलमा परमेश्वरको विषयमा सम्पूर्ण सत्यताहरू छैनन् तर जति हामीले जानेको प्रभुले चाहानुभयो त्यति प्रकाश भएका छन्। बाइबलका ६६ पुस्तकहरूलाई दुई खण्डमा राखिन्छ – पुरानो नियम र नयाँ नियम। पुरानो नियममा ३९ पुस्तकहरू छन् र नयाँ नियममा २७ पुस्तकहरू।
            बाइबलमा प्रकट भएका ईश्वरीय शिक्षाहरूद्वारा हामी परमेश्वरको चरित्र, इच्छा, योजना, र कार्यहरू जान्न सक्छौं। साथै हामी आफ्नै विषयमा पनि धेरै तथ्यहरू जान्दछौं। हामी कहाँबाट आयौं? हाम्रो जीवनको अर्थ के हो? हामी मरेपछि कहाँ पुग्छौं? यस्ता प्रश्नहरूको साँचो उत्तरहरू बाइबलमा नै पाइन्छ। अनि पाप र पाप क्षमाको विषयमा पनि हामी बाइबलबाट नै थाहा पाउँछौं। अनन्त जीवनको बाटो र ख्रीष्टियन जीवनको पदप्रदर्शक हो बाइबल।
            बाइबलका हरेक पुस्तक नै हाम्रा लागि उपयुक्त छन्। ६६ पुस्तकमध्ये एउटा पुस्तक मात्रै हामीले अध्ययन गर्न छुटायौं भने हामीलाई नोक्सानी हुन्छ।